கதை

வண்ண சித்திரப்படங்கள் நிறைந்த
புத்தகம் காட்டி
கதை சொல்லிக்கொண்டிருந்தேன்
குழந்தைக்கு

அவள் கண்வெளியில்
கதையொரு உலகமாய் விரிகையில்
பாத்திரங்களின் பெயர்களுக்கு
பழகி விட்டிருந்தாள்

பக்கங்கள் புரள
கதையின் உயிர்ச்சரடை பிடித்துவிட்டவள்
வெகு எளிதில் திறந்தாள்
யூகங்களின் கதவுகளை

உச்சமாய்
தன்னையும் என்னையும்
கதாபாத்திரங்களாய் நுழைத்தாள்

உக்கிர வாள்சண்டையில்
கொடிய தானியேல்
என் கரங்களை வெட்டுகையில்
பயத்தில் அழத்துவங்கியவளை தேற்ற
வெளிவர வேண்டியதாயிற்று இருவரும்

அவள் உறங்கிவிட்ட பின்
கதைக்குள் நுழைந்தவன்
வாளை பொறுக்கிக்கொண்டு
நடக்கத் துவங்கினேன்
தானியேலை தேடி