கைத்துப்பாக்கி

டூமில் என்ற எழுத்துக்களோடு
கறுப்பு வெள்ளையில் ரத்தம் தெறித்த
காமிக்ஸ் புத்தகத்தில்தான்
துப்பாக்கிகள் அறிமுகமாயின
சினிமாக்களில் அவை வெடித்தபோது
சிவப்பாக ரத்தம் திரையில் தெறித்து
டூமில் சத்தங்கள் காதுகளைப் பிளந்தன
சுருள்கேப் சுற்றிய தீபாவளித் துப்பாக்கிகளால்
சுட்டு விளையாடியபோது
சத்தமும் புகையும்தான்
ரத்தமும் பிணமும் இல்லை
ஆனால் துப்பாக்கிகள் கற்பனையானவையல்லவென்றும்
ஏராளமான சவக்குழிகள்
அவற்றால் தோண்டப்பட்டிருப்பதையும்
துப்பாக்கி முனைகளில்
வரலாறு திசைதிரும்பியிருப்பதையும்
வளர்சிதையின் வழியே அறியும் இக்காலத்தில்
பூமியில் வெடிக்கக் காத்திருக்கும்
துப்பாக்கிகள் அச்சமூட்டுகின்றன
கடவுளுக்குச் சொந்தமான எல்லாம்
சாத்தானுக்கும் பாத்தியதையானதைப்போல்
நீதியும் அநீதியும்
ஒரே மாதிரியான சீருடை அணிந்து
ஒரே ரக துப்பாக்கிகளை ஏந்தியிருக்கின்றன
சீறும் ரவைகளில்
யார் பெயர் எழுதப்பட்டிருக்கிறதென்பது
இறுதிநொடி வரை
குழப்பமாக இருக்கும்
இந்தக் காமிக்ஸ் கதையைப் படிக்கையில்
வலதுகையின் விரல்களை நீட்டிக்குவித்து
துப்பாக்கியைப் போலவே
நான் வைத்திருப்பது
ஒரு அனிச்சைச் செயலல்ல.