பாதுகாப்பு மண்டலம்

நானொரு மென்பொருள் வல்லுனன்
என் வாழ்வாதரங்களை
எவ்வித குற்றவுணர்வுகளுமின்றி
கடவுச்சொல் வைத்துப் பாதுகாக்கிறேன்

சர்வதேச தொழில்நுட்ப பூங்காவின்
கண்ணாடிக் கட்டிடங்கள்
அழகும் கம்பீரமும் உயரமும் கொண்டவை
அருகிலமர்ந்திருக்கும் வெள்ளைக்கார மாது
வெகு நளினமாய் புகைக்கிறாள்
துப்பாக்கி ஏந்திய காவலர்கள்
தூரத்தில் விறைப்பாய் நடக்கிறார்கள்

என் பாதுகாப்பு மண்டலத்திற்கு வெளியே
நிகழ்ந்துகொண்டிருக்கிறது யுத்தம்
மனிதர்கள் மரிக்கிறார்கள்
மறந்தும் நானென் பார்வையை
சடலங்களின் மீது விடுவதில்லை

ஆயுதங்களுடன் திரிகிறார்கள் அவர்கள்
அதுவென் பயத்தை பெருக்குகிறது
வரும் வரை காத்திருந்து
இரவுகளுக்குள் பாய்ந்தோடி
கன்னிகளின் நிர்வாணத்தை உதறி
கனவில் போர்த்திக்கொள்கிறேன்-அங்கே
இனிய நிமித்திகங்களை
மரப்பல்லியொன்று இசைக்கிறது

வெகு அமைதியில் திளைக்கும்
என் கனவு
ஒரு காற்றுக்குமிழியாய்
இவ்வெளியில் அலைகிறது
இன்னும்.