தஸ்தாவெஸ்கியின் நண்பர்கள்

பகலின்
சிற்றிரைச்சல் மிகுந்த குடிநிலையங்களில்
தஸ்தாவெஸ்கியின் நண்பர்கள்
போதை கனிந்த கண்களோடு
வாழ்வினோடு சூதாடுகிறார்கள்
குற்றமோ
ஒரு நாய்க்குட்டியாய்
காலைச் சுற்றுகிறது
அள்ளியெடுத்து வருடி
அதற்கொரு முத்தமிடுகையில்
கண்ணோரங்களில் துளிர்ப்பது
அறத்தின் நீர்முகம்
மலரைப்போல் நோய்மை
இதயத்தில் பூத்திருக்கையில்
மரணமோ
வரிசையில் நிற்கவைத்துப் பார்த்துவிட்டு
கலைந்துபோகச் சொல்கிறது
தஸ்தாவெஸ்கியின் நண்பர்களுடைய
காதலிகளோ
ஆண்களேயற்ற
வேறொரு பிரதேசத்தில் இருக்கிறார்கள்
ஏதொன்றும் செய்யவியலாமல் வெகுண்டு
குடிநிலையத்தை விட்டு வெளியேறி
பனியாலான
பளிங்குநிற வாள் உயர்த்துகையில்
வெளியே உக்கிரமாக எரிகிறது
வெயில்.