சில குற்றங்கள்

சில குற்றங்கள்
சட்டபூர்வமாக்கப்பட்ட செய்தி
தாளிலிருந்து குதித்து
தெருவில் போகையில்
பூக்காரம்மாவின் கூடையிலிருந்து
உதிர்ந்த வண்ணங்கள்
பறப்பதைப் பார்க்கிறது
நிறமற்ற பூக்களை
அவள் தெருவில் சரித்துப்போக
அவியும் நிலத்தை
ஏளனமாக பார்த்த அது
சூரியன் தன்னை எரித்துக்கொள்ளும்
உச்சிவெயிலில்
அதன் கண்ணெதிரே
வெட்டுப்பட்டவனின் குருதியில்
குதியாளமிடுவதைப் பார்த்த இக்கவிதை
திடுக்கிடலில் “சரக்” கென
தன் தலையை
ஓட்டுக்குள் இழுத்துக்கொள்கிறது.