என் மிருகம் பற்றிய குறிப்புகள்

உள்ளொரு மிருகம் வளர்த்தேன்
கூரிய நகங்களோடும்
குரூரம் மிக்கதாயும்

புகழுரைத்தவன் பாதங்களில்
வருட வைத்தேன்
என் மிருகத்தின் நாவை

பின்னால் இகழ்பவரிடம் காட்டினேன்
இடுக்குகளில் சதைத்துணுக்கு படிந்த
அதன் கூரிய பற்களை

வீழ்த்த நினைத்தவர்
கழுத்தைக் குதற
ஏவினேன் என் மிருகத்தை

அவ்வப்போது வேண்டுமென்றே
என் மிருகம் அவிழ்த்து
சுற்றம் பயமுறுத்தினேன்

மெல்லத் தன் வலிமை
கண்டுகொண்ட
என் மிருகத்திற்கு
இப்பொழுதெல்லாம் தேவையாயிருக்கிறது

என் குருதியும்.