பால்யம்

அன்றைய
அந்திப்பொழுது
வீடு திரும்புதலில்
படிந்திருக்கும் அழுக்கு
உடம்பில் மட்டும்

விளையாட்டில் விட்டுக்கொண்ட காய்
எப்படியும் பழுத்துவிடும்
மறுநாள்

தூக்கிச் சொருகிய சேலையோடு
வெளுத்த சலவைக்காரியின்
வெண்தொடைகளை
விகல்பமின்றி பார்த்ததெல்லாம்
சிறுநீரில்
விந்தனுக்கள் கலவாத காலங்களில்

உள்ளம் போகும் தடத்தில்
உதைபந்தனெ இருந்த நாவு
இன்று சொற்களைத் தேர்கிறது
திறமையானதொரு
சதுரங்க ஆட்டக்காரனின்
காய் நகர்த்தலாய்

பகிர்தலையும் புன்னகையையும்
புதைத்த இடத்தில்
மீந்த எலும்புத்துண்டுகளாய்
குதூகலமும் புனிதமும் நிறைந்திருந்த
அவரவர் பால்யம்.